Lytta til kvalar utanfor Svalbard

Forskarar ved NTNU og Cornell University har samla inn og overført nærare 7 terabyte med rådata dagleg til NTNU i Trondheim, over ein periode på 40 dagar, gjennom forskingsnettet.

Dette har dei gjort ved hjelp av ein optisk sensorteknikk kalla Distributed Acoustic Sensing (DAS).

Gir nye og spennande moglegheiter

Rådataene har så blitt analysert. I materialet har forskarane bak studien mellom anna kunna identifisere over 830 kvallydar, ei rekkje jordskjelv, skipstrafikk og fjerne stormar.

Forskarane ser ei rekkje bruksområde for denne typen data i framtida.

– Å bruke Sikts fiberoptiske infrastruktur på denne måten gir oss forskarar nye og spennande moglegheiter. For det første opnar det for ny forsking å bruke vanlege fibrar til å måle akustiske signal over eit svært breitt frekvensområde (frå millihertz til kilohertz) både til havs og på land, seier ein av forskarane bak studien, Martin Landrø.

Landrø er professor i geoakustikk ved Institutt for elektroniske system (NTNU) og leiar av Centre for Geophysical Forecasting.

– I tillegg kan vi bruke systema til Sikt for å overføre store datamengder i sanntid. Kopla saman med AI og andre analysemetodar gir dette nye og uante moglegheiter innan overvaking og varsling, fortel Landrø. 

Meir informasjon

• Forskingsartikkel: Sensing whales, storms, ships and earthquakes using an Arctic fibre optic cable. Publisert i Nature 10. november 2022
• De tjuvlytter på hvaler i Arktis (Gemini.no, sjå også engelsk versjon)
• Forskingsartikkel: Eavesdropping at the Speed of Light: Distributed Acoustic Sensing of Baleen Whales in the Arctic. Publisert i Frontiers in Marine Science 5. juli 2022