Med lov skal data delast - høyringsfråsegn frå Sikt
Ny lovgiving om vidarebruk av offentlege data (NOU 2024:14) har vore på høyring. Lovforslaga er svært relevante for Sikt og brukarane våre, og vi har derfor ønskt å nytte oss av høvet til å påverke forslaget gjennom å gi ei høyringsfråsegn.
12. desember 2024
Kva innspel har Sikt gitt?
Dei viktigaste fem bodskapane frå Sikt i høyringsinnspelet om NOU 2024:14 "Med lov skal data delast" har vore:
1: Viktig å innføre ny datadelingslov
- EU-regelverket bør raskt bli del av norsk lov, fordi datadeling gir store samfunnsmessige fordelar.
2: Tydelege plikter og føreseieleg finansiering for offentlege verksemder
- Loven må vere tydeleg på kva plikter offentlege verksemder får. Dette for å sikre einskapleg praksis som fremjar datadeling.
- Det må vere meir føreseieleg kva for nokre økonomiske og administrative konsekvensar lovforslaget får for offentlege verksemder. Inkludert korleis infrastrukturar for datalagring og deling skal finansierast.
3: Tydeleg og brukarvennleg regelverk
- Departementet bør vurdere om nye føresegner kan bli integrerte i eksisterande lovar, framfor å innføre dei som nye lovar (unngå fragmentering).
- Ny lov må gi klare definisjonar av "vidarebruk" og "forskingsdata".
- Det må vere tydeleg kva typar forskingsdata det blir plikt til å dele.
- Loven må ha klare definisjonar og grenseoppgangar mellom data som skal delast og data som skal vernast.
4: Krav til standardisering og interoperabilitet
- Loven bør stille krav om at data blir gjort tilgjengeleg i standardformat som fremjar interoperabilitet. Samtidig må krava vere gjennomførbare for offentlege verksemder.
- Tilrår å lovfeste metadatastandardar som støttar FAIR-prinsippa, for å sikre at data kan bli delt og gjenbrukt effektivt.
- Microdata.no, utvikla av Sikt og SSB, er ei tverrsektoriell plattform. Gjer det mogleg med sikker og effektiv kopling og analyse av beskytta registerdata frå fleire sektorar.
5: Prioriteringsråd og nasjonal datakatalog
- Rådet som skal prioritere kva data som skal bli delt, bør ha ei brei samansetning og inkludere representantar frå kommunal sektor, næringsliv, forsking, media og sivilsamfunnet.
- Nasjonal datakatalog (data.norge.no) bør bli vidareutvikla. Ikkje berre vere tilgangspunkt (der brukarar får tilgang til data), men også informasjonspunkt – der brukarar får rettleiing og støtte til å finne, forstå og bruke offentlege data.