Overgang til Nasjonalt vitenarkiv blir utsett til etter NVI-rapporteringa

Utprøvingsperioden, som blei gjennomført i september og oktober, var ein milepæl for prosjektet. Det betydde at nødvendig funksjonalitet for ein første fullskala versjon av NVA var klar for å kunne prøvast ut i breitt – altså eit Nasjonalt vitenarkiv som kan erstatte dagens Cristin og over 70 lokale vitenarkiv.  

Første utprøving i stor skala 

Dette var første gong systemet blei testa ut i stor skala, med avtalt Cristin-funksjonalitet på plass.  

Utprøvingsperioden skulle gi høve til å bli kjend med systemet, og førebu seg på overgangen. I tillegg blei deltakarane bedne om å melde inn feil og gi tilbakemeldingar undervegs.  

Resultata og tilbakemeldingane frå utprøvingsperioden skulle deretter vurderast i styringsgruppa for prosjektet den 28. oktober. Styringsgruppa består av representantar fra UHR, FFA, Forskningsrådet, UiB og UiO.  

Behov for grundigare testing 

I andre veke av utprøvingsperioden blei det avdekt nokre vesentlege feil, og delar av søkjefunksjonaliteten var utilgjengelege i ein periode, som følgje av reindeksering. Sikt retta feila og forlengde utprøvingsperioden med ei veke.  

Vi måtte forvente at utprøvingsperioden ville avdekkje feil, men det var uheldig at nokre av feila var såpass vesentlege. Dette gjekk naturleg nok på kostnad av tilliten til brukarane til om systemet er klart for hovudlansering, og har ført til behov for ytterlegare testing og utprøving. 

I etterkant av utprøvingsperioden har Sikt teke imot fleire tilbakemeldingar og tilrådingar om vegen vidare via ulike kanalar, som alle blei tatt med i vurderinga i styringsgruppa.  

NVI-rapportering for 2024 blir gjennomført i Cristin 

Styringsgruppa vurderte korleis ein kan redusere risiko og sikre at løysinga har tillit i sektorane. Dei viktigaste elementa her var å sikre tilstrekkeleg tid til å forsikre seg om at løysinga fungerer, tid til å førebu institusjonane på mottakarsida, og konsekvensane for NVI-rapporteringa.

Etter ei totalvurdering var det semje om at det er større risiko å satse på lansering av NVA i desember, med NVI-rapportering med nytt system, enn å gjennomføre rapporteringa i Cristin. Dette òg fordi denne funksjonaliteten ikkje har vore godt nok prøvd ut i NVA så langt.  

Styringsgruppa tilrådde derfor å gjennomføre NVI-rapportering i gammalt system, og avvende overgangen til rapporteringa er gjennomført.  

På denne måten unngår vi at overgangen til NVA kjem på toppen av NVI-rapporteringa. Det gir òg institusjonane meir føreseielegheit og betre tid til å førebu seg på overgangen. 

Utarbeider revidert tidsplan når NVA er godkjent etter ny testing 

Styringsgruppa tilrådde vidare at prosjektet gjennomfører re-testing som planlagt i samarbeid med testgruppa, og lagar ein plan for ein ny utprøvingsperiode. 

Prosjektet vil utarbeide ein revidert tidsplan/tidslinje når resultata etter re-test og ny utprøving tilseier at systemet er klart for hovudlansering. Gitt NVI-rapportering på gammalt system kan det ikkje skje før etter rapporteringa er avslutta våren 2025. 

Det er sjølvsagt kjedeleg med nye forseinkingar, men det viktigaste er at vi er trygge på at systemet fungerer godt og er grundig testa når vi lanserer. Dette gir òg betre kapasitet og tid til å få ein god overgang, både for oss og brukarinstitusjonane.

Tidspunkt for lansering vil bli avklart god tid i forkant, for å sikre god kommunikasjon og involvering i brukarinstitusjonane.