Nordisk nettverksbygging i Bergen
Tysdag opnar NORDUnet-konferansen i Bergen, med Sikt som vertskap. Meir enn 250 deltakarar frå heile verda er samla for å lære, diskutere og bli oppdatert på den siste utviklinga innan digital infrastruktur for forsking og høgare utdanning.
9. september 2024
Konferansen går over tre dagar, med både plenumssesjonar og djupdykk innanfor tema som spenner frå undersjøiske nettverkskablar, via skytenester for forskarar, til korleis kunstig intelligens påverkar digital eksamen.
Langvarig nordisk samarbeid
Konferansen er den 32. konferansen i rekkja, og er den viktigaste møteplassen for det nordiske forskingsnettmiljøet.
Konferansen samlar avgjerdstakarar, teknologar og forskarar frå Norden, Europa og resten av verda. Ansvarleg for konferansen er Sikt, saman med det nordiske forskingsnettsamarbeidet NORDUNET, etablert I 1986.
Det nordiske nettverkssamarbeidet gir forskarar, undervisarar og studentar rask og sikker tilgang til kollegaer og ressursar på tvers av Norden og over heile verda.
Det blir òg samarbeidd om mellom anna campusnettverk og trådlause nettverk, skytenester, forelesingsopptak, videoundervisning og dessutan tilgangs- og påloggingstenester.
Omfattande internasjonalt engasjement for Sikt
Nettverk og relaterte tenester er berre eit av områda der Sikt deltek i eit omfattande internasjonalt samarbeid som gir fordelar for norske forskarar, undervisarar og studentar.
Open forsking, forskingsinformasjon, studentmobilitet og undervisningsadministrasjon er andre område der vi arbeider internasjonalt.